Ping kach (17)

Ping kach

Semirap kan petang, anak-behanak Mama' Tunak lah masok gale kedalam humah. Senandung baceaan selawat nabi dai mesjid brang sane lah te aning, negal agi azan maghrib. Nulah Mama' Tunak lah ngajahkan ke anak-anaknye dai kecek, "asak lah nak maghrib ngatek agi yang nak husek diluah humah", ujinye ngumongi ke anak-anaknye. Amen ade anaknye yang dek nganingkan umongan, bakal disebati Mama' Tunak gok rotan. Pantas nian anak-anak Mama' Tunak nuhut gale umongan Baknye. Ngatek nian gale anak-anaknye yang maseh diluah humah.

Allahu akbar, Allahu akbar

Allahu akbar, Alahu akbar

Asyhaduallah ilahaillah

Asyhaduallah ilahaillah

Asyhaduannamuhammadarosulullah

Asyhaduannamuhammadarosulullah

...

Lah te aning suare azan dai mesjid, Mama' Tunak ngajongkan ke anak-anaknye sembahyang, "bedaklah kudai wawe-wawe ni, matikanlah kudai tv, aningkan kudai lah azan maghrib, embeklah ayach wudok, empe kite sembahyang bejama'ah", uji Mama' Tunak. Lah sudeh sembahyang, maseh lom kene anak-anaknye nak nunton tv, "kele kudai nak ngidupkan tv, dek kan ketinggalan adak nak nunton, ma'itu-ma'itu lah acaranye tu, ngadoh ye aneh nian, banyaklah die bohongnye ceritenye tu, galak nian dibudikannye, uhang dapat duitnye, kite ngange kian". Uji Mama' Tunak ngumongi anak-anaknye.

Tune, ngadoh munyian suare jeme dalam humah ni, cuman ade te aning suare jangkrik. Dek lame itu, suare Ibung Tune mecah heningnye malam itu. "Bak, pela kite makan kudai", "Ma, ajaklah ading-ading ngan makan, kite makan mbak-rembak, gulai ade dikit ini lah, kele ade ye dek kebagian, jadi ribut". Kate Ibung Tune ngomung ke lakinye wan anak-anaknye nak ngajak makan. Ting tang ting munyi pring beradu wan sudu dang makan ni, asing ade suare mulut anak-anaknye pule behebut gulai, nak ngambek nduluan, nak ye besak, nak ye banyak. "Cuka makani dek nak besak nian gase, ngape dektau ape makan men dek be suare", "tiap nak makan ma'itu lah", segalenye nak jadi hebut, segalenye nak jadi ribut". Uji Ibung Tune ngumongi anak-anaknye.

Sudeh dai makan, segale piring, cangkir, sudu, panci, kuali maseh kamah gale wan brantakan kian di tundan. Lom ade ye galak nak mbasoinye. Nulah di inankannye nian dai Ibung Tune. Dalam pikirannye ni, "ade dekde anaku ni ye galak mbasoi srane bekas makan wan gulai yang kamah". Lah sudeh jeme azan Isya' di mesjid, lom ade yang nak besengkut mbasoinye. "Ma", "Ju", "Dan", "Ja", "Ya", ngape ngatek yang nak mbasoi srane bekas makan wan gulai tu, dekde nak nunggu di ajung kudai empai begerak, anak jantan, anak betine same kian, nak galak gale begawi, kanye nak macalkan, kanye pule nak nyarekan, untung di kamu tulah, siape ye galak ngaja'i jeme penyungkan". Uji Ibung Tune marahi ke anak-anaknye.

Begeraklah anaknye bungsu pegi ke tundan, "Sak Ma, tulong ambekkan kudai ayach untok mbasoi ini, ngadoh ayach nye nak so-basoani", "dek cukup men nye seember inilah".

Nimballah Sak Ma ni, "Au, kele kudai aku gi lesu", "badanku ni dang sakit-sakit gale".

Nimbal pule Umaknye, "Pedie ngan gawikan, Ma?", "Mangke cak kelesuan nian, lok dai begawi behat kian, sungkan nian diajong ni, behat gale angkatan, banyak gale alasan, badan gi mude, men lah dipingkachkannye dai Yang maha Kuase mpai mehase".

Maseh marahi anaknye Ibung Tune ni, "kele kamu ni nak bebini nak belaki, men dang demam bini, ape laki dang demam, ape Umak wan Bak ngani dang demam, siape agi nak di ajong, sangkan nak ditembaikan dai ma'ini ahi lah, mangke tebiase". "Hala nak dipintak badan di pingkachkan-Nye", "nganeing !"

Sampai disini kian cerite “Pingkah”, bace cerite kelanjutannye di judul “Lom Keruan”

Meleile (16)

Meleile

Di sebelah humah Mama' Tunak, ade tetanggennye, namenye Mama' Junglai. Die ni lah sekancean dai kecek, kemane-mane kian husek die ni dek kelah bepisah wan Mama' Tunak. Jemenye besak tinggi, galak wawe, pacek pule kelakar. Siepe bekance ke die ni setuju gale jeme, banyak pule jeme kenal ke die ni, tue mude kenal ke die ni, dai pangkal dusun sampai ke ujung dusun tembus pule ke dusun sebelahnye, maseh kenal ke die ni. Tunde die ni galak wawe tapi dek galak ngumongkan wan nyakiti uhang lain, sangkan banyak jeme setuju bekance ke die ni.

Siang ahi, mateahi kian lah tinginye embak batang niuch tekinak dai mate Mama' Junglai. Nyuhcuh peloh di badannye, negal kian keluah dai humah lah bepeloh. Nulah ini dang ahi kemahau, lah lame juge dek ujan mencaknye lah ade tige minggu lom ujan. Singgah Mama' Junglai ni ke humah Mama' Tunak.

"Assalamu'alikum...", Ngucap salam sambil nuktuk lawang pule Mama' Junglai ke lawang humah Mama' Tunak. Dek lame itu, lawang humah Mama' Tunak tebukak, sambil balas salam teaning suare dai dalam humah, "Wa'alaikum salam ..". "Oh, ngan Jung!, Mpe masok kudai". Uji Mama' Tunak ngajai'i Mama' Junglai masok. "Damenye rasan, mangke besigat siang ahi ke humah ni, loknye ade yang di pendam", "kalu kian aku pacak nulongi".

Nimbal Mama' Junglai, "Au Tun, nulah aku ni ade rasan, nukunulah cak-icaknye tu".

"Ngape cak-icaknye tu ai, dekde serius ige retinye tu", Uji Mama' Tunak nimbali umongan Mama' Junglai.

Nimbali pule Mama' Junglai, "Dekde Ooo, ngun nian aku ni, serius", "Due bulan agi kite ni nak ade pemilihan kades, jadi aku ni ade rencane nak nyalon kades", "makmane menuhut ngan kalu aku ni milu nyalon kades pule, pacak dekde ngan nulongi aku nggut pacak jadi kades tu".

Nimballah Mamak Tunak ni ngenjok saran gok pendapatnye, "Menuhut ku, ilok rencane ngan tu nak jadi kades, ape agi ngan kanceku semakan seminum dai kecek, aku dukung", "cuman nak jadi kades tu banyak nak disiapkan, sebelum gok sesudehnye kele".

Nimbal pule Mama' Junglai, "Persiapan ape yang ngan maksud sebelum gok sesudehnye tu?"

Nimballah Mama' Tunak ni, "Dihi nak siapkan duit untok biaye macam-macam senye, untok cetak gambar dihi, untok ngajak jeme-jeme men kite mbuat kegiatan salat bangat senye, nah itu persiapan dihi sebelum nyalon kades", "Au kalu kite menang pacak jadi kades, tapi men kalah suare dai pesaing kite, ape ngan lah siap men kalah, duit abis, utang numpuk disane-sini mangke gagal jadi kades". "Bukannye aku nak nyempekan ngan, bukan pule ndak nulong ngan, tapi aku ni ngenjokan saran pendapatnye hala sampai tejadi hal-hal dek ilok tejadi di ngan kelenye".

Nimbal Mama' Junglai, "Au, aku lah siap gale ape kian bakal tejadi, siap menang siap pule kalah".

"Au, hadu amen ngan lah siap nian gale ape kan bakal tejadi", "Nawaitu, Bismillah, kite usaha sekuat tenage, segalenye kite serahkan dan mohon du'a ke Allah SWT". Uji Mama' Tunak nimbali umongan Mama' Junglai.

Ade lime kandidat kades yang bakal betarung mehebutkan jadi jeme numor satu di desanye. Ade lime dusun yang milu pemilehan kades dan lime ratus jeme yang punye hak suare. Kelime kandidat kades nggunekan simbol kian untuk mewakili die, ade yang begambar palak huse betandok, ade begambar ayam beruge yang panjang tajinye, ade begambar palak himau nunjokan taringnye, ade yang begambar palak hebau betandok panjang, ade pule begambar palak kijang yang tandoknye becabang-cabang.

Setiap juhu talang di jengo’i gale dai Mama’ Junglai wan Mama’ Tunak serte pendukungnye, dai Talang Semut sampai ke Talang Rupit. Pegi gi akap balek lah akap pule, singgenye tunggang langgang, puntang panting, kemane kian juhu talang asak gi ade jeme, dijengo’i gale. Kenye jeme kian yang sibuk gok gawinye nggut tecapai kendaknye, iblis pule milu lebeh sibuk mbisekan ke cuping masing-masing kandidat kades wan jeme-jeme paraknye. Si anu ngatekan, “jenggok puyang ini, jenggok puyang itu men nak tecapai jadi kades, lah banyak buktinye yang jadi”. Si landap ngatekan, “men nak tecapai jadi kades, kecakan kehis ini wan minyak ini”, ade pule yang ngatekan, “amalkan bacean ini wan kecakkan batu ini, tanduk ini, kulit ini mangke pacak tecapai jadi kades”.

“Jung, ngan hala tepancing gok kate si anu, uji si anu, ngan yakin kian ke Maha Kuase, Allah SWT, segale gawi, segale rencane hanye Die yang ngatur, legalenye lah tersirat wan tersurat gale. Amen ngan menang jadi kades itu kendak Maha Kuase, amen kalah juge itu pule kendak Maha Kuase”. Uji Mama’ Tunak ngenjok nasehat gok Mama’ Junglai.

Nimbali pule Mama’ Junglai, “Au Tun, benah nian umongan ngan, segale hasilnye kele ku terime, yang penting kite usaha sekuat tenage”, “Alhamdulillah ngucap syukor men tecapai jadi kades, men lom tecapai kele retinye kanye di sane bidang kite”.

Tanggal lime bulan lime, ahi pemilehan. Segale jeme datang dai lime dusun ke badah pemungutan suare. Sampai kul due belas tepat, ngadoh agi yang nak nyoblos. Maseh di tunggukan kalu ade jeme lom nyoblos, nggut kul due belas liwat tige puloh menit ngadoh agi jeme nak nyoblos. Kul satu siang tepat kotak suare dibukak, pengitungan suare dimulai. Gup degup jantung lime kandidat kades, kembang kempis dadenye nunggukan hasil pemilahan tadi. Dudok dek tunak agi, makan endaknye masok, gelisah becapur was-was. Siape nian ye unggul jadi pemenang. Kul lime petang lah tekumpul gale kertas suare dai lime dusun itu, petugas pemungutan suare mulai ngitung dai hasil rekap tiap-tiap TPS. Dek lame itu diumumkan bahwe kandidat kades ye unggul suarenye yeitu Mama' Junglai, die lebeh banyak suarenye dibandingkan empat kandidat kades lainnye.

"Alhamdulillah syukur Yaa Allah, Engkau enjokan amanat ini ke aku untok mimpin desa", "semuge aku pacak mimpin desa ini lebeh ilok wan dekde melenceng dai jalan yang Engkau ridhoi". Sambil sujud syukur Mama' Junglai ngucapkan kate-kate itu. Dek lame, datanglah Mama' Tunak ke humah Mama' Junglai nak ngucapkan selamat. "Alhamdulillah.. ngan unggul jadi pemenangnye, semuge ngan pacak njalankan amanat ini dengan benah, hala melenceng, hala nyarekan rakyat"," aku kan ngingatkan ngan mangke dekde salah gune jabatan". Uji Mama' Tunak ngenjokan pesan ke Mama' Junglai.

Empat kandidat kades yang kalah suarenye, ade yang nerime, ade pule yang dek nerime kekalahannye, ade ye ngange kian, temenung kian, tetawe-tawe suhang, kadang ade ye besempak kian bejalan-jalan tengah dusun. Meleile lok dek jage, ade pule ye laju gile. Akibat dekde siap kalah. "Jung, itulah ye ku maksud siap sesudehnye", "ngan aning wan kinak, kandidat yang lainnye laju meleile kerne dekde siap nerime kekalahannye", "Alhamdulillah ini dekde tejadi ke ngan, amun ngan ye ngalami lok jeme itu, alangke lalaknye gawi", "itulah ye kusupakan nian kalu itu ngan ye ngalaminye". Uji Mama' Tunak ngumongi Mama' Junglai. Nimbal pule Mama' Junglai, "Au Tun, mekaseh nian segala usaha wan nasihat ngan, aku pule nulah wanti-wanti engke hala tejadi di aku, juga hala sampai aku ye ngalaminye", "Alhamdulillah syukor Ya Allah, aku dekde ngalaminye".

Sampai disini kian cerite “Meleile”, bace cerite kelanjutannye di judul “Pingkah”

Unyek, Tagich wan Agang (15)

Unyek, Tagich wan Agang

Wak Utami, Kerne name anak pertamenye Utami Putri, di antau seahi-ahinye dai jeme lingkungan humahnye Wak Uta. Humahnye dek jaoh ige dai humah Mama' Tunak, paling kelang lime humah. Humahnye panggung cetnye warne biru mude. Die ni tinggal cuman wan lakinye agi, anak-behanaknye lah belaki wan bebini gale, lah ade humah wek-diwek gale pule. Seahi-ahi gawi Wak Uta pegi ke kume wan lakinye, betanam padi wan jagung nunggui pule buah taunan lok, hambutan, duku wan dehian.

Diadapan pekarangan humah Wak Uta ade pule tanaman hambutan wan batang belimbing besi. Amen dang bebuah, hambutannye ni lebat nian buahnye ma'itulah pule belimbing besinye. Wak-wak gok Ibung-ibung ye parak ke humahnye, agat nian mintak buah belimbing besinye untok mais ikan kadang pule untuk nggulai pindang wan kadang pule untok nyambal calok. Nulah wak Uta ni jemenye baik, siape kian ye nak mintak buah belimbing besinye pasti kian di enjo'inye. Cuman siape kian jeme ye nak minta damenye kian gok Wak Uta ni, nak uyek mangke pacak die ni ngenjokan. Hala pule kite galak ngucak ke tanamannye wan srane punye die, ndak nian die kalu ade jeme ye nak ngucak, pacak ceceinye wan pule gutoknye gok batu. Itulah, Wak Uta ni jemenye tagih.

Ahi gi akap, mateahi lom lah nyentul. Abis dai sembayang Shubuh, Wak Uta wan lakinye lah besiap nak pegi kekume. "Kang, payu kite brangkat ke kume mumpung ahi gi hedup, lemak dekde panas ige", uji Wak Uta ngaja'i lakinye ke kume. Nimballah lakinye, "Payulah ding, kite brangkat ke kume, aku ni lah siap dai tadi". Nginak Wak Uta wan lakinye lah pegi ke kume, bujang-bujang wan gadis-gadis ye dang mehancak-hancak nian mulai ngambek buah hambutan punye Wak Uta. Ye bujangnye naik batang hambutan, ye gadisnye melangainye di bawah batang. "Die ubatnye, kalu jeme tagich ige, ambek i yam-diam", uji Sak Ma ni ngumong gok kance-kancenye. Puas makani buah hambutan, "empe kite pegi, kele ni Wak Uta balek dek kubar agi kite nak belahi, pacak di ceceinye kite".

Ahi lah kul lime petang Wak Uta wan lakinye mpai balek dai ume, dikinaknye daun hambutan nyembuch kian di ngalaman humahnye, mihah muke Wak Uta, "siapelah tun gawi, engke nyebuch kian daun hambutan ni, awas kian ku imbangi siape ye bebuat ini". Ujinye bekate dalam ati.